بالفيديو / فاتن الفازع توجه رسالة مؤثرة لابنتها

 


نشرت الكاتبة التونسية المثيرة للجدل فاتن الفازع، اليوم السبت 23 أفريل 2022، رسالة مؤثرة جدا وجهتها لابنتها "سندرا" وذلك بعد القضية التي قدمها ضدها طليقها لسحب الحضانة منها بعد تصريحاتها الأخيرة، وقالت فاتن أنها تمرّ بأزمة نفسية والتجأت إلى المهدئات لكنها لن تسلّم في ابنتها وهذه الرسالة التي وجهتها لها :" لبنتي وشمس حياتي سندرا بلخوجة اليوم علنا باش نكتبلك رسالة ، سندروشتي الغالية اللّي صكّتني في كرشي واللي تبنى بيناتنا رابط ما ينجّم يربط حدّ بيك اسمو الحبل السرّي ، الكوردون أومبيليكال . حبيبتي ، اليوم نحبّ نقلّك آش نتمنّالك ، نتمنّالك تكون مرا مثقّفة ، نحبّك تجادلني على إعجابي بسپينوزا وتقلّي اللّي فكر نيتشة اللي نعتبرو إقصائي يمثّلك أكثر ، نحبّك تحكيلي على دافينشي وعلى كليمت وحبيبنا موديلياني وعلى نحوت رودان اللي هزّيتك تتفرّج فيهم وإنت فزغولة وعلى قصّة حبّو مع كامي كلودال ، نحبّ نحكيوا على قدّاش زيت لازم لطنجرة الملوخيّة وأهميّة الثوم والكمّون في الكسكسي بالحوت … نحبّ نحكيلك على داليدا وأمّ كلثوم اللي كبرت معاها وعلى تشبّث الصبّوحة بالأنوثة وبالحياة وعلى كره الفاضل الجزيري لكلمة ياساق وعلى حبّي المرضي لعزيزك وبإعجابي باستماتة سيّدة تونس الغولة في الدّفاع عن مواقفها … نحبّك تسإلني علاش عمري ما قلتلك خمّل بيت خوك وعلاش الزوز شناشن ذهب متاع سسّو مماتي وعدتك باش نقسمهملك قدّك قدّو إنت وأرسلان … على خاطرك مرا سندرا ، على خاطرك حرّة وتربّيت حرّة نحبّ ثقافتك تكون سلاحك ، ثقافتك هي اللي باش تخلّيك عزيزة … سندرا بنتي وشمس حياتي ، نتمنّى نشوفك ناجحة ، نتمنّى نسمعك تقلّي لا ممّا موش هكا ، نتمنّى نشوف عينيك تلمع بالحبّ ، حبّ الكولاج واللّيسي والجامعة وبعد الجامعة ، نتمنّاك تقعد صغيرة مع الرّاجل اللي اختارو قلبك ما نحبّكمش تكبروا ، أسمع منّي أقعدوا صغار ! ولوم عليّا كي تكبر تسكيرة باب بيتي باش نكتبب تو نجاوبك أنو من حقّي باش نحلم ، نحلم ببلادي تونس ، أمّي اللي عديت سنين غربتي نلوّج عليها في كلّ وجه أغنج وكلّ باكو دڤلة وحيط مقرقش وحكّة هريسة … إسئلني على هاك الإعلامي اللّي وقف معايا كي تمدّت السّكاكن الكل ضدّي وقلّي علاش تحبّو هكّا ، وقلّي اللي عمرك لا ريت كاتبة تحبّ قرّائها قدّك … نتمنّالك روايح ڤاتو بالفانيليا في دارك سندرا ، الڤاتو البسيط متاعنا اللي بالياغورت… ريحة الحبّ ، ريحة الخبز عالفجاري، معجون السفرجل و الفراز والرمّان بالزّهر … نتمنّى أنّك تكون مرا حرّة ، مرا تمّن بالقيم متاع المساواة والحريّة وقبول الآخر … غنجتي ، مزيانتي ، شمس حياتي وبنّونتتي … آنا فاتن الفازع أمّك أتعهّد قدّام تونس كلّها أنّك أكبر من جسد و باش نقنع جميع القضاة بأفكاري وباش نصيح ونعيّط ، أنّك مرا حرّة ، وباش ندافع على حقّك في الحريّة لآخر نفس في حياتي واللي ما يقتلناش يقوّينا ويستحيل يقتل حاجة فينا .



إرسال تعليق (0)
أحدث أقدم